Á árinu 2012 munu Samtök um Kvennaathvarf minnast þess með ýmsum hætti að 30 ár eru liðin frá stofnun samtakanna og opnunar Kvennaathvarfsins sem allar götur síðan hefur veitt konum og börnum þeirra skjól þegar dvöl á heimilum hefur verið óbærileg vegna ofbeldis.
Á þessum árum hafa á sjöunda þúsund gesta dvalið í athvarfinu til lengri eða skemmri tíma. Að auki hefur mikill fjöldi kvenna þegið ráðgjöf og stuðningsviðtöl, tekið þátt í sjálfshjálparhópum og leitað stuðnings og upplýsinga í neyðarsíma athvarfsins.
Nýleg íslensk rannsókn bendir til þess að á hverju ári séu á bilinu 1200-2300 konur á Íslandi beittar líkamlegu og/eða kynferðislegu ofbeldi af hálfu maka eða fyrrverandi maka (eða 1-2% íslenskra kvenna á aldrinum 18-80 ára).
Það er því ljóst að í Kvennaathvarfið leitar aðeins lítill hluti kvenna sem búa við ofbeldi í nánum samböndum. Í ljósi þess fögnum við síaukinni aðsókn og teljum hana benda til þess að athvarfið sé betur kynnt en áður og að konur séu tilbúnari til að nýta sér þjónustu þess,frekar en að ofbeldi sé endilega að aukast.
Afmælisárið verður meðal annars notað til kynningar á Kvennaathvarfinu og þjónustu þess sem og til fræðslu og upplýsingagjafar um ofbeldi í nánum samböndum, eðli þess og birtingarmyndir.
Hér að neðan er listi yfir einkenni ofbeldis í samböndum:
Ofbeldi í nánum samböndum
Yfirleitt þekkjum við líkamlegt ofbeldi og líklegt er að þú skilgreinir það sem ofbeldi ef maki þinn slær þig eða kýlir, sparkar í eða bítur þig, lokar þig inni, sker þig eða hendir í þig hlutum. Andlegt ofbeldi er erfiðara að greina og því hefur oft mikið gengið á áður en brotaþoli áttar sig á því hvað er að gerast.
Óæskileg framkoma getur stundum verið ofbeldi en stundum ekki. Það fer eftir kringumstæðum, upplifun, því sem hefur gengið á áður og því hvar völdin liggja í sambandinu. Annað flokkast alltaf undir ofbeldi.
Þú ert í ofbeldissambandi eða þú ert hugsanlega í ofbeldissambandi ef maki þinn;
- hefur þig undir ströngu eftirliti
- kemur í veg fyrir að þú hittir vini þína eða fjölskyldu
- takmarkar aðgang þinn að peningum
- kemur í veg fyrir að þú vinnir utan heimilis
- segir þér hvernig þú átt að klæðast
- fær fram vilja sínum með hótunum
- öskrar á þig og svívirðir þig
- virðir ekki skoðanir þínar og tilfinningar
- sakar þig um svik eða framhjáhald
- þvingar þig til að horfa á klám
- gagnrýnir þig og verkin þín
- niðurlægir þig á almannafæri
- ásakar þig um það sem hann sjálfur eða aðrir bera ábyrgð á
- eyðileggur persónulegar eigur þínar
- neyðir þig til samfara eða annarra kynlífsathafna
- rengir upplifanir þínar t.d. þegar hann hefur komið illa fram við þig
- hótar að fyrirfara sér ef þú lætur ekki að vilja hans
- niðurlægir þig kynferðislega
Inni á heimasíðu Kvennaathvarfsins, www.kvennaathvarf.is er að finna spurningalista sem eru ganglegir til að meta ofbeldi í samböndum.
