Búið er að ómskoða 105 konur hér á landi með PIP púða og hefur komið í ljós að púðar leka hjá 71 konu eða í um 68% tilfella. Konum stendur til boða að láta fjarlægja fyllingarnar en ekki fá nýjar fyllingar í þeirra stað.
Samkvæmt frétt frá Velferðarráðuneytinu hefur Lyfjastofnun sent framkvæmdastjórn Evrópusambandsins upplýsingar um háa lekatíðni falsaðra PIP brjóstapúða hér á landi.
Bleikt hafði samband við konu sem er með PIP púða sem ekki eru farnir að leka og hefur hún áhyggjur af þeim sem sitja hinumegin við borðið:„Hvað á ég að gera? Á ég að vera undir sérstöku eftirliti? Ég vil ekki að púðarnir verði teknir úr mér og ég fæ ekkert í staðinn. Ég ætti að vera tilbúin að fá aðra púða strax.“
Konurnar sem hafa fengið PIP púða stefna nú á hópmálssókn og hafa ráðið lögfræðinginn Sögu Ýrr Jónsdóttur. Sumar hverjar glíma við þunglyndi og kvíða vegna málsins og mun koma í ljós fljótlega hvaða stefnu þær taka.
Eftir því sem best er vitað hefur hvergi annars staðar verið ráðist í skipulega ómskoðun kvenna með PIP brjóstafyllingar. Samanburðarhæfar upplýsingar lekatíðni þeirra frá öðrum þjóðum eru því ekki fyrir hendi.
Þann 7. febrúar síðastliðinn samþykkti ríkisstjórnin tillögu velferðarráðherra um að bjóða öllum konum sem fengið hafa PIP brjóstapúða hér á landi að láta nema þá brott með aðgerð á vegum Landspítala. Með þessu var aukið við fyrri ákvörðun heilbrigðisyfirvalda um aðgerðir þar sem konum stóð til boða að láta nema brott leka púða.
Ákvörðun um brottnám allra PIP brjóstapúða var tekin í samræmi við faglegt mat Embættis landlæknis sem byggist á niðurstöðum skýrslu sérfræðingahóps Framkvæmdastjórnar Evrópusambandsins,SCENIHR. Meðal annars er horft til þess að fyrirbyggjandi brottnám PIP brjóstafyllinga sé konum skaðminna en brottnám púða þegar þeir eru farnir að leka, líkt og fram kemur í erindi Embættis landlæknis til velferðarráðuneytisins.
Samkvæmt ákvörðun heilbrigðisyfirvalda stendur konum til boða að láta fjarlægja PIP brjóstafyllingar í aðgerð á vegum Landspítala en ekki verða settar inn nýjar fyllingar í þeirra stað.
Staðfest hefur verið að bólgusvörun er meiri við leka frá PIP brjóstapúðum en öðrum brjóstapúðum og brottnám þeirra því erfiðara vegna þess. Embætti landlæknis bendir á þetta íerindi sínu til velferðarráðuneytisins3. febrúar síðastliðinn. Þar segir jafnframt að vegna bólgunnar sem myndast og áhrifa hennar á nærliggjandi svæði séu minni líkindi til þess að mögulegt sé að setja inn nýja púða um leið og PIP brjóstapúðarnir eru fjarlægðir.
Íslensk heilbrigðisyfirvöld eru í beinum samskiptum við hlutaðeigandi yfirvöld og eftirlitsstofnanir í Evrópu og fylgjast grannt með þróun mála varðandi PIP brjóstafyllingarnar hjá öðrum þjóðum.
