Bleikt barst eftirfarandi grein í tölvupósti:
Nú get ég bara ekki orða bundist og ákvað þess vegna að skrifa hugrenningar mínar niður. Það eru pottþétt margir sem tengja við þetta og það er kominn tími til að einhver láti vaða.
Ég er 27 ára kona sem er mjög venjuleg. Ég er einhleyp og er svo sem engin nunna en samt engin „drusla“ eins og margar konur (já, eru ekki konur konum verstar?) hafa kallað mig. Það er ekki það versta, að vera kölluð „drusla“ heldur þykir mér enn verra að vera úthrópaður hjónadjöfull. Þegar ég segi úthrópaður, á ég við að inni á ónefndum spjallsíðum hefur verið talað um mann vegna ákveðinna mála og þar er sko ekki verið að spara stóru orðin. Onei!
Nú hef ég gefist upp á að svara þessum „kerlingum“ (já, konur eru konum verstar – og þar er ég sennilega engin undantekning) á spjallsvæðinu og skrifa grein í staðinn til að varpa ljósi á stöðu margra kvenna og karla.
Hér kemur þetta: Einhleyp kona (eins og ég) hittir mann úti á djamminu. Eitthvað gerist og þau ákveða að hittast aftur. Þá segir hann frá því að hann sé í skilnaðarferli og því sé alveg að ljúka. Kannast einhver við þetta?
Nú vil ég strax taka fram svo konur líti ekki út fyrir að vera sífellt fórnarlömb undirförulla karlmanna: Þetta getur líka verið á hinn veginn. Einhleypur maður hittir konu o.s.frv.
Nema hvað, það sem gerist næst (svo ég haldi mig við kvenkyns sögupersónuna) er að allt gengur vel en einhleypa konan er farin að hafa áhyggjur af því að þau (nýja „parið“) þurfi stöðugt að vera í feluleik. Bíddu, var gæinn ekki að skilja og allt að klárast þar?
Einn daginn fær einhleypa konan símtal (að sjálfsögðu úr leyninúmeri) eða sms frá bandbrjálaðri kerlingu sem kallar hana hjónadjöful! Segir að hún sé búin að eyðileggja dásamlegt hjónaband, allt hafi verið frábært þar til HJÓNADJÖFULLINN skaut upp kollinum. Einhleypa konan kemur af fjöllum og veit ekki hvaðan á sig stendur veðrið: „Bíddu, hvaða kerla er þetta eiginlega?“
Jújú, þetta er náttúrulega „fyrrverandi“ sem var hreinlega ekkert neitt „fyrrverandi“ á þeim tímapunkti sem einhleypa konan hitti manninn. Hann sagði einfaldlega ekki satt.
Skilnaðarferli – minn rass! Það getur nefnilega verið ansi hreint langt ferli og byrjar bara í huganum.
Hjónadjöfullinn hefur þegar tekið sér bólfestu í lífi hjóna þar sem svona lagað gerist! Hjónadjöfullinn er ekki þriðji aðili sem veit ekkert hvað er í gangi hjá einhverjum hjónum. Hjónadjöfullinn hefur einfaldlega orðið til í hugum þessa fólks!
Takk fyrir að lesa og ég gæti trúað að margir tengi við þessa frásögn sem ég byggi á eigin reynslu.
________________________________
Ykkur er velkomið að senda okkur greinar og hugrenningar á bleikt@bleikt.is
