Evyan Metzner er tískuritstjóri tímaritsins SELF hjá Conde Nast. Hún hefur stíliserað fjölmargar myndatökur, unnið með heimsþekktum ljósmyndurum og leikkonum á borð við Jennifer Aniston og Gwyneth Paltrow. Bleikt fékk tækifæri til að spyrja Evyan nokkurra spurninga.

Á rúmum tuttugu ára starfsferli hefur Evyan Metzner komið víða við og kynnst alls konar fólki. Ljósmyndarar sækjast eftir að vinna með henni og má þar meðal annars nefna Bruce Weber, Patrick Demarchelier, Annie Leibovitz, Carter Smith, Reagan Cameron og Norman Jean Roy.

Hún hefur stíliserað myndatökur með Beyonce, Jennifer Aniston, Jennifer Hudson, Gwyneth Paltrow, Carrie Underwood, Kristen Bell, Taylor Swift og listinn er endalaus. Anna Rósa tók viðtalið í Los Angeles.

Evyan Metzner

Hvernig hefur tískuheimurinn breyst á þínum ferli – sérstaklega í dag þar sem hátískuheimurinn heldur áfram að stækka og styrkjast?

„Aðalbreytingin er sú að það er ekkert til lengur sem kallast „Evrópskt merki” – það er ekkert sem eingöngu fæst í París, eða bara í Mílanó. Nú er hægt að versla hátísku nánast hvar sem er í heiminum (í hvaða stórborg sem er). Það er ótrúlegt hvaða upplýsingar eru aðgengilegar öllum sem eiga tölvu. Síður eins og Style.com gera fólki hvar sem er í heiminum kleift að sjá hvað er að gerast í tískuheiminum. Upplýsingar sem áður voru eingöngu aðgengilegar fyrir tískuritstjóra.“

Hversu mikil áhrif hafa þessar leikkonur sem þú stíliserar fyrir tímarit á myndatökuna/stílinn – eins og t.d. Sarah Jessica Parker, mætir hún a settið með hugmyndir?

„Sumar gera þær það. Það fer eftir því hvort um er að ræða forsíðu eða tískusögu. Þetta snýst um samvinnu og að finna jafnvægi í því hvað þær vilja og hvað tímaritið vill. Að vinna með leikkonu eins og Sarah Jessica Parker sem elskar föt er alltaf spennandi. Hún er svo opin fyrir því að prófa nýja hönnuði og hún veit hvað hún vill – það gerir starfið auðveldara.“

Hvert sérðu hátískugeirann stefna?

„Ég held að hátískugeirinn sé á mjög góðum stað í dag – sem og með bjarta framtíð. Áhrif netsins, tískublogga og Twitter gera tískuna svo ofboðslega aðgengilega.“

Hverjir eru uppáhaldshönnuðir þínir?

„Dries Van Noten, Marni, Louis Vuitton, Marc by Marc Jacobs, Prada og Rebecca Taylor.“

Hvaða flíkur eru þínar „go to“ flíkur – hverju klæðist þú í vinnunni?

„Aðsniðnir blazer jakkar, gallabuxur, einfaldir háir hælar, eða mótorhjólastígvél og litrík handtaska. Þegar ég er mikið á fundum klæðist ég kjólum – ég elska Marni kjólana mína.“

Hversu erfitt er að komast inní tískugeirann – sem stílisti eða tískublaðamaður?

„Það er rosalega erfitt. Þetta er svakaleg vinna. Það eru margar fljótandi kannski-verðandi stjörnur í geiranum í dag, en það sem þarf til að endast í þessum geira er hörku vinna og sá eiginleiki að geta unnið með fólki af öllum gerðum.“

Hvað finnst þér um tískubloggara?

„Ég elska tískubloggara – sérstaklega þá sem eru með ákveðna rödd sem endurspeglar persónuleika þeirra og þora að vera með sinn eigin stíl.“

Þrír topp eiginleikar kvenna sem þarf til að koma sér vel áfram í dag?

„Að vera skýrmælt, diplómatísk, og hafa almenna skynsemi.“

Eru konur í of mikilli samkeppni í dag – þurfum við að brýna systrakennd okkar?

„Ég held að konur í dag hafi komið langt að – mun lengra en þar sem við vorum þegar ég byrjaði í þessum geira. Konur í dag eru með fjölskyldu og skilja hvor aðra og hvað þarf til að meika það í nútímasamfélagi.“

Hvað er fegurð?

„Að líða vel innra með sér. Fegurðin kemur að innan.“

Og þá er komið að aðal– og lokaspurningunni…

How do you like Iceland?

„Ég elska Ísland, hef komið þangað tvisvar og finnst Ísland vera eitt fallegasta land sem ég hef séð.“

Og svo ein bónus spurning…

Hvað finnst þér um íslenskar konur?

„Mér finnst íslenskar konur alveg rosalega fallegar – ég elska allt þetta ljósa hár…“