Greta Salóme Stefánsdóttir fiðluleikari vakti athygli fyrir einstaklega fallega, nútímalega og smekklega útgáfu af íslenskum upphlut í undankeppni Eurovision á RÚV á miðvikudagskvöldið.
„Kjóllinn var hugmynd sem ég fékk. Lagið er þjóðlegt og svolítið íslenskt og ég fékk þá hugmyndina að nota gamla upphlutinn. Við fengum efri hlutann lánaðan og svo hannaði Rebekka Ingimundardóttir pilsið og Elma Bjarney Guðmundsdóttir, búningahönnuður hjá Borgarleikhúsinu, saumaði það. Við þrjár hjálpuðumst að við að hanna konseptið,“ útskýrir Greta Salóme sem hefur fengið mikil viðbrögð við kjólnum.
Hugmyndin varð til fyrir jól og var útfærð eftir áramót þegar atriðið var undirbúið. Greta Salóme segir að lagið Mundu eftir mér byggist á gamalli íslenskri sögu um Ragnheiði Brynjólfsdóttur og unnusta hennar sem geti ekki verið saman en elski hvort annað og trúi á því að dag einn verði allt gott aftur. „Þegar ég fór að hugsa um hvað myndi henta með þessu lagi varð þessi hugmynd til og þetta hélst bara í hendur,“ segir hún.
Lagið varð til í Skálholti 2010 þar sem Greta Salóme, sem er með BA-próf í fiðluleik og er að klára masterspróf frá Listaháskólanum jafnframt því að vera fiðluleikari í Sinfóníuhljómsveitinni, var í tónlistarvinnubúðum fyrir mastersnema í tónlist. Hún var þá að klára að lesa frásögnina af Ragnheiði og unnusta hennar og kláraði að semja lagið.
Fer það saman að vera í klassískri tónlist og taka þátt í Eurovision?
„Já, það gerir það merkilega vel. Ég held að það nýtist mér rosalega vel að vera búin að læra og vinna í klassíska geiranum svona lengi. Ég nota menntunina mína og allt sem ég lært í lagasmíðarnar. Ég hef fengið ótrúlega jákvæð viðbrögð frá félögum mínum í Sinfóníuhljómsveitinni og alls staðar. Allir eru ótrúlega jákvæðir og hafa stutt mig vel þannig að þetta hefur farið vel saman. Það hjálpar líka að hafa unnið við að koma fram í mörg , mörg ár.“
