Fimmtánfaldur Íslandsmeistari í dansi! Við Íslendingar erum ríkir af framúrskarandi og efnilegu fólk á öllum sviðum, líka í dansinum. Hanna Rún Óladóttir er einn efnilegasti dansari landsins en hún hefur dansað sig á toppinn frá 4 ára aldri. Í dag er hún 21 árs, fimmtánfaldur Íslandsmeistari og í nóvember 2011 var hún, ásamt dansherra sínum, kjörin Norður-Evrópumeistari. Hanna Rún segir okkur frá dansinum, velgengninni og umfram allt, kjólunum.

Hanna Rún segir í viðtali við Bleikt að hún hafi verið að koma fram Belgíu með dansfélaganum: „Við Siggi vorum að koma heim frá Belgíu en þar vorum við að keppa á Grand Slam móti ásamt þeim bestu í dansinum. Þetta eru mjög stór og sterk mót en þarna voru mætt 6 pör af þeim bestu ásamt 20 stjörnupörum og auðvitað fleiri keppendum. Okkur gekk ekki eins vel og við hefðum viljað, en okkur gekk ekki illa. Við hefðum viljað ná aðeins lengra. Við gerum kröfur og erum ströng við okkur. Við ætlum alla leið og erum dugleg að hvetja hvort annað áfram. Þetta er samvinna, enda erum við tvö í þessu.“

Hanna Rún er trúlofuð dansfélaganaum, Sigurði Þór

Hanna Rún og dansfélagi hennar, Sigurður Þór Sigurðsson, hafa dansað saman síðan í Janúar 2009 en láta sér dansinn ekki duga því þau eru einnig trúlofuð og saman eru þau staðráðin í því að ná á toppinn og ætla ekki að hætta fyrr en þau hafa unnið heimsmeistara titillinn. Þess vegna æfa þau 6 sinnum í viku, nokkra tíma í senn.

„Við mætum bæði í einkatíma og á hópæfingar. Við æfum okkur einnig mikið sjálf og þegar það er stutt í keppni leggjum við enn harðar að okkur. Um þessar mundir erum við að undirbóka okkur fyrir Íslandsmeistaramótið sem verður næstu helgi, þá kemur í ljós hvort ég hreppi Íslandsmeistara titilinn sextánda árið í röð. Ferðinni er svo heitið til Kaupmannahafnar þar sem við munum keppa á öðru Grand Slam móti og aðeins þremur vikum seinna förum við til Frakklands að keppa. Fljótlega eftir það keppum við á Bikarmeistaramótinu og um páskana stefnum við á Evrópumeistaramótið í Barcelona,“ segir Hanna Rún.

Æfingarnar eru þó ekki það eina sem skiptir máli en þau passa bæði upp á mataræðið og nota fæðubótarefni frá Hreysti til þess að viðhalda orku og einbeitningu en þau þurfa svo sannarlega á allri sinni orku að halda enda munu þau ferðast út og keppa í hverjum mánuði þetta árið.

„Ég á yndislega fjölskyldu sem ég elska af öllu mínu hjarta. Þau styðja mig og Sigga 110% og gera allt sem þau geta til að hjálpa okkur. Þau vilja sjá okkur fara alla leið á toppinn og styðja okkur ekki bara andlega heldur líka fjárhagslega. Ég gæti þetta aldrei ein enda svo margt sem þarf að greiða, allar utanlandsferðirnar, hótelin, leigubílarnir, danskjólarnir, keppnisgjöldin og danstímarnir hérlendis og erlendis.“

Það ríkir mikill kærleikur í fjölskyldu Hönnu Rúnar en það eru ekki eingöngu foreldrar hennar sem styðja hana. Hanna Rún á tvær systur sem eru einnig duglegar að aðstoða hana og hjálpa til við hvað sem er, ekki aðeins keppnisundirbúning.

En hvernig eru hinir glæsilegu danskjólar og dansskór?

„Kjólarnir koma dýrir og ódýrir. Þeir geta kostað allt að hálfa milljón, stundum meira og stundum minna. Kjólarnir eru skreyttir Swarovski kristöllum og fer það eftir magni steinanna hversu dýrir kjólarnir geta verið. Skóparið kostar í kringum 20 þúsund krónur. Þeir eru misjafnir og sumir endast betur en aðrir. Það skiptir miklu máli að vera í góðum skóm og gott er að eiga eitt æfingarpar og annað keppnispar enda skiptir útlit skóna miklu máli þegar keppt er. Við Siggi notum Supadance skóna og eru þeir að okkar mati langbestu dansskórnir.“

Hanna Rún segir að dans sé fyrir unga sem aldna og að allir geti lært listina. Hvetur hún alla til að prófa þetta enda er þetta, að hennar sögn, skemmtileg íþrótt.

„Það er aldrei of seint að byrja, þetta er rosa gaman og auðvitað er þetta frábær hreyfing fyrir líkamann“