Magnað hvað maður þarf alltaf að ganga langt á sjálfan sig til þess að gera eitthvað til þess að laga þessa verki sem maður böðlast með alla daga. Vöðvabólga sem maður er bara farinn að lifa með daglega eða axla- og bakverki. Maður segir við sjálfan sig: „Ég fer á morgun.“
En á morgun segir sá lati er máltæki sem allir þekkja en fatta ekki að nota það um sjálfa sig. Ég þekki þetta ferli afar vel. Hugsunin er alltaf bara: Smá meir og svo geri ég eitthvað í þessu. Líkaminn lætur mann alltaf vita þegar nóg er komið, en ég hef ekki alltaf verið tilbúin til að heyra það.
Fyrir einu og hálfi ári síðan var ég að þjálfa mig til þess að getað hlaupið yfir Laugaveginn sem er 55km ofurmaraþon. Þjálfunin fyrir það reyndist mér erfið og var ég endalaust í meiðslum og leitaði lausna hjá læknum og bæklunarlæknum sem gáfu mér því miður fá svör um annað en að hvíla. Það reyndar tók ég ekki í mál og ákvað að bryðja þá bara fleiri voltarentöflur. Áfram hélt ég að leita lausna og fann þá „foam“ rúlluna sem allir íþóttamenn útí heimi voru byrjaðir að nota. Ég hélt ég yrði ekki eldri fyrstu skiptin vegna sársauka. En með tímanum byrjaði ég að mýkjast upp og fór að líða betur.
Það voru ekki bara meiðslin sem hurfu heldur byrjuðu aðrir verkir að fara líka. Málið var að ég einblíndi alltaf á sama verkinn og leyfði hinum verkjunum að eiga sig á meðan þessi stóri var að ergja mig. Við þessa þjálfun mína að rúlla mig á hverjum degi með foam rúllu fór ég út í meiri vinnslu á hvað þetta væri að gera fyrir mig. Ég varð alveg ástfangin af mætti rúllunnar og vildi láta alla vita.
Bara það að losa um streitu eða vökvasöfnun sem hrjáir annan hvern manninn var nóg ástæða en það er svo margt annað sem rúllan gerði fyrir líkamann. Að mýkja upp vöðvana og leyta eftir hnútum til að losa um þá. Því spenna og verkir hlaða bara ofan á sig ef maður gerir ekkert í þeim. Já það er sárt ef þú ert með verki, eins og ég sagði í fyrirsögninn að þá finnur heilbrigður vöðvi ekki til, en eftir nokkra tíma finnurðu rosalega mikinn mun og mikla virkni á streitulosun.
Ég hef verið þjálfari í ansi mörg ár og eftir að ég kynntist þessari tækni þá þróaði ég Foam Flex. Æfingarnar fara fram í heitum sal til að ná meiri slökun svo við getum farið örlítið dýpra að okkur. En það er eitt sem ég mun klárlega leggja til við alla að byggja grunninn sinn vel svo þú getir byggt ofan á hann, og einnig sem er eins og gleymt hugtak hjá fólki að fyrirbyggja meiðsli. Þetta er ekki þannig að þú sért að standa þig betur ef þú ert með verki og þjáist vegna ofálags. Ég tel þetta hafi bjargað mikilli streitu og verkjum hjá mér, ég hef algjörlega fundið lausn sem virkar til að láta mig klára markmiðin mín.
