„Ég kem hingað til lands þrisvar á ári og held þá eins mörg námskeið og ég get. Ég er í raun og veru að færa mig úr sólinni í snjóinn og öfugt þegar ég flakka svona á milli Íslands og Dúbai. Það virkar vel og er skemmtileg tilbreyting,“ segir Helga Marín semstendur fyrir námskeiðinu „Áramótaheitin og hvernig á að standa við þau“ í líkamsræktarstöðinni World Class fimmtudaginn 2. febrúar og þriðjudaginn 7 febrúar. Á námskeiðinu hjálpar Helga Marín fólki að komast inn í nýjan lífsstíl og viðhalda honum.

Lífsstíll og streita

Helga Marín hefur búið í Dubai í tólf ár og rekur þar sitt eigið fyrirtæki, Health, Mind & Body þar sem hún býður bæði fyrirtækjum og einstaklingum upp á allskonar ráðgjöf og aðstoð við lífsstílsbreytingar, heldur námskeið og fyrirlestra. „Ég hef sérstöðu á mörgum sviðum. Á heilsusviðinu hjálpa ég fólki að breyta um lífsstíl, skipta um mataræði og komast inn í hreyfinguna,“ útskýrir Helga Marín.

„Á sviði sjálfseflingar kenni ég fólki að vera öruggara með sjálft sig, koma fram og finna sjálfa sig og sinn tilgang í lífinu. Í þriðja lagi er svo streitan. Fyrirtæki fá mig mikið til að halda námskeið um streituna og hjálpa starfsfólkinu að breyta upplifun sinni og sjá raunveruleikann í nýju ljósi til að finna fyrir minni streitu. Í fjórða lagi er svo heilsan og hvernig einstaklingar geta tekið þátt í að lækna sig af sjúkdómum.

Hér á landi hef ég nokkrum sinnum verið með fyrirlestra í Ljósinu. Framtíðardraumurinn er að vinna með spítulum í að innleiða meiri fræðslu um hvernig sjúklingar geta tekið þátt í heilunarferlinu bæði með bættu mataræði og breyttu hugarfari,“ segir Helga Marín.

Vill vekja fólk til umhugsunar

Helga verður hér á landi út febrúar og mun standa fyrir margskonar námskeiðum en á fyrsta námskeiðinu ætlar hún að einblína á lífsstílinn og lífsstílsbreytingar „því það er þessi tími á árinu. Ég er þegar búin að bóka yfir fimmtán fyrirlestra hjá fyrirtækjum í næstu og þarnæstu viku. Í síðustu viku bauð ég fyrstu fyrirtækjunum sem höfðu samband við mig upp á einn frían fyrirlestur. Það kemur til greina að bjóða upp á fleiri ef tími gefst til.

Markmið mitt í lífinu er að hjálpa fólki að taka meiri ábyrgð á eigin heilsu og hamingju og er því tilgangur minn með fyrirlestrunum að vekja fólk til umhugsunar hvernig það geti bætt líf sitt og látið drauma sína rætast. Mörg fyrirtæki hér heim gera sér grein fyrir því að afkastageta starfsfólks og starfsandi á vinnustöðum fer eftir vellíða starfsfólksins og því er mikill áhuga á þessum fyrirlestrum mínum. Einnig fæ ég tækifæri að ná til stærri markhóps í gegnum fyrirtæki og get ég því látið gott af mér leiða,“ segir hún.

Helga ætlar að bjóða almenningi upp á námskeiðið, Áramótaheitin og hvernig á að standa við þau, í World Class Laugum. „Ég er mikið að vinna með hugann og mátt hans, kenna fólki að skilja undirmeðvitundina og hvernig á að prógrammera hana upp á nýtt. Ég bjó til þetta námskeið fyrir fólk sem vill komast inn í nýjan lífsstíl og viðhalda honum út lífið, sem vill vinna með hugann svo að það þurfi ekki að byrja frá grunni aftur og aftur.“

Breyta hugmyndum

Námskeiðið hefst fimmtudaginn 2. febrúar og er tvö skipti 2. og 7. febrúar. Í fyrra skiptið fer Helga Marín yfir það af hverju tilraunin til að breyta um lífsstíl mistekst alltaf og hvað það er sem stendur í vegi fyrir fólki. „Þó ég kenni líka næringarfræði þá er mitt sérsvið að vinna með hugann og hjálpa fólki að hafa rétt hugarfar til að komast inn í réttan lífsstíl. Mitt verk er að breyta hugmyndum fólks um nýja lífsstílinn þannig að fólki finnist það ekki leiðinlegt, erfitt eða vont heldur að því takist að prógrammera heilann þannig að okkur líði vel í nýja lífsstílnum. Við förum í gegnum ýmis hjálpartæki sem ég hef þróað í fimmtán ár,“ útskýrir hún.

Helga Marín hefur líka önnur námskeið á prjónunum. „Endapunkturinn er að kenna fólki að taka ábyrgð á sinni heilsu og hamingju og vita að allt sé hægt ef hugarástandið er rétt. Við komumst hvert sem er, okkur standa allar leiðir opnar ef við höfum bara rétt hugarfar,“ segir hún.