Mig langar að kynna þig fyrir manneskju. Þetta er alveg einstök manneskja, það er engin til eins og hún. Þessi manneskja hefur frábær áhugamál, einstaka hæfileika og er nákvæmlega eins og hún á að vera.
Þessi fullkomna manneskja er elskuð af foreldrum sínum, systkinum, vinum og ættingjum. Hún er skemmtileg á sinn hátt og það er gaman að henni þegar hún hlær. Hún er ef til vill ekki vaxin eins og flottustu módelin en það gerir ekkert til af því að hún er með einstakt vaxtarlag sem hentar henni vel.
Hún er ekki endilega með skjannahvítt bros eða þráðbeinan tanngarð. Eyrun á henni geta jafnvel staðið pínu út og hún er oft ekki sátt við hárið á sér en það gerir ekkert til, því þessi ótrúlega manneskja er fullkomin nákvæmlega eins og hún er.
Ef þú lítur í spegilinn þá sérðu hana, einstöku manneskjuna. Þér finnst hún kannski ekki eins heillandi og mér en ég get lofað þér því að það er engin til eins og hún. Það er það sem gerir hana fullkomna, einstaka og öðruvísi. Það er það sem gerir hana spennandi og dásamlega.
Prófaðu að setjast fyrir framan spegilinn og segja þessari manneskju allt það sem þér finnst jákvætt við hana, slepptu öllu því neikvæða og segðu henni aðeins frá því jákvæða, því þessi manneskja sem þér finnst ef til vill lítið til koma er stórkostleg. Hún er eina útgáfan af sjálfri sér í öllum heiminum og fyrir það er hún dásamleg!
