Inflúensan er farin að ganga hér á landi en nær samt ekki hámarki fyrr en undir lok febrúar. Kvefpestirnar eru hinsvegar á fullu og meira um að fullorðnir, börn og unglingar leggist í rúmið af þeim sökum en vegna flensunnar.
Landlæknisembættið vaktar inflúensuna náið. Guðrún Sigmundsdóttir, yfirlæknir á sóttvarnasviði, segir að inflúensan H3 hegði sér svipað og í fyrra. Hún hafi verið vaxandi hingað til og búast megi við að hún nái hámarki upp úr miðjum eða í lok febrúar. Þá er talsvert um að kvefpestir gangi.
Munurinn á kvefpestur og inflúensu er sá að inflúensan kemur snögglega með háan hita, hósta, höfuðverk og beinverki. Kvefið læðist hinsvegar að og byrjar sem væg hálsbólga, svo kemur hósti og nefrennsli en sá kvefaði fær ekki endilega háan hita þó að sú þumalfingursregla sé ekki algild.
„Þetta er tími kvefpestanna þannig að það er ekkert skrítið þó að fólk sé veikt núna,“ segir hún og bætir við að kvefið geti verið erfitt, stundum standi það í heila viku. Til að forðast að smita aðra sé gott að hnerra í tissjú eða í olnbogabótina, þvo sér vel um hendurnar og spritta hendurnar.
Guðrún mælir með því að fólk meti sjálft hvort það treystir sér í vinnu eða skóla ef það er kvefað en ef það er með inflúensu þá mælir hún með því að hvíla sig, liggja í rúminu og fara vel með sig þó að stundum geti líka verið of mikið af því góða. Þeir sem eru kvefaðir ættu hinsvegar að sleppa ræktinni og fara varlega. „Það þarf að bera virðingu fyrir kvefpestunum,“ segir hún og mælir með því að fólk finni út sjálft hvað því finnst hæfilegt með rúmlegu og heimavist. „Maður finnur best sjálfur hvað er hæfilegt í því efni,“ segir hún.
Landlæknisembættið fær greiningar á inflúensunni frá heilsugæslulæknum og bráðamóttökum og hefur því alltaf nýjustu og bestu upplýsingarnar um stöðuna. Þetta gerist í nýlegu vöktunarkerfið sem embættið hefur verið að þróa í nokkur ár. Fljótlega er svo meiningin að koma í gang vöktun á öðrum pestum sem ganga þannig að embættið hafi alltaf nýjustu upplýsingar um þær líka.
Nánari upplýsingar má finna hérog þróunina á inflúensufaraldrinum í Evrópu má sjá hér.
