Íslenskur læknir bjargaði sjón þriggja ára sænsks drengs eftir að hafa séð mynd af honum skaðbrenndum í framan á Facebook.
Martin, 3ja ára, fékk slæman bruna í andlitið og stokkbólgið auga eftir að hafa ákveðið að bjarga sér sjálfur um heitt O‘boy kakó. Hann setti bollann inn í örbylgjuofninn þegar enginn sá til heima hjá sér og kveikti á ofninum. Síðan lét ofninn vita að hann væri búinn og áður en nokkur náði að bregðast við var Martin búinn að taka bollann út úr ofninum. Hann hellti í leiðinni heitu kakóinu yfir sig.
Á aðeins nokkrum sekúndum var augað orðið stökkbólgið og andlitið blóðrautt. Aftonbladet hefur eftir móður Martins, Åsa Lagerstam, að þau foreldrarnir hafi skolað Martin upp úr köldu vatni og flýtt sér svo með hann á heilsugæslustöðina í Laholm í Svíþjóð en þar var hann bara sendur heim skaðbrenndur. Læknirinn reyndi að opna augað en tókst ekki að deyfa það og bað þau því að koma bara aftur næsta dag .
Um kvöldið vall gröfturinn út úr auganu. Fjölskyldan reyndi að fá neyðaraðstoð í Halmstad en voru send heim. Daginn eftir fóru þau aftur á heilsugæslustöðina í Laholm. Andlit Martins var þá orðið illa farið af bruna og bólgu en læknirinn sagði bara að þetta myndi jafna sig. Eina ráðið væri að „fara heim og láta martröðina halda áfram,“ segir í frétt Aftonbladet.
Skjáskot: Aftonbladet.se
Um kvöldið setti Åsa, móðir Martins, mynd af honum á Facebook til að systir hans gæti séð áverkana. Tveimur mínútum síðar hrindi læknir á Íslandi. Åsa hafði spjallað áður við eiginkonu læknisins því að hundahald er sameiginlegt áhugamál þeirra. Læknirinn Flosi Karlsson er vanur að fást við brunaáverka og hann hvatti fjölskylduna til að fara þegar í stað til sérfræðings.
„Mér skildist að það væri hætta á sýkingu, jafnvel heilahimnubólgu,“ segir Åsa við Aftonbladet. Hún fór beinustu leið á neyðarmóttökuna í Halmstad og krafðist þess að fá læknisaðstoð. Sömu nótt var sonur hennar sendur á brunavaktina í Linköping. Þar kom í ljós að þriðjungur af hornhimnunni í auganu hafði orðið illa úti og Martin fékk að sjálfsögðu alla þá aðstoð sem hann þurfti. Talið er að sjóninni hafi verið bjargað en það skýrist betur eftir hálft ár.
Heilsugæslustöðin í Laholm hefur verið kærð til heilbrigðisyfirvalda í Svíþjóð.
