Mikið hefur verið fjallað um einelti undanfarið, og mjög góð ástæða til. Vegna þessarar umræðu fór ég að hugsa til baka og til grunnskólaára minna. Ég fór að hugsa um þessar óteljandi kannanir sem að við vorum látin taka um einelti og líðan í skólanum og man ég að okkur fannst þetta alltaf jafn leiðinlegar kannanir og alltaf svaraði ég eins: „Nei, ég hef ekki orðið fyrir einelti“, „Nei, ég hef ekki lagt í einelti“, „Nei, ég hef ekki orðið vitni að einelti“ og annað í svipuðum dúr.
Á meðan sat ekki langt frá mér strákur í bekknum mínum sem var lagður í einelti næstum á hverjum degi, en ég vissi ekki að það væri einelti, mér fannst þetta allt í lagi. Hann var öðruvísi, hann sýndi aldrei að honum liði illa. Þetta gekk svona áfram frá 5 bekk og upp í 10 bekk.
16 ára krakkar voru að gera grín að strák sem hafði önnur áhugamál en við, klæddi sig á annan hátt og talaði furðulega en enginn okkar hafði hugmynd um að þetta væri einelti. Þessi strákur hafði gaman af því að lesa bækur um ofuhetjur og teikna skrímsli og ofurhetjur og þess háttar, hinir strákarnir voru vaxnir upp úr því og farir að pæla í stelpum, bílum og þeirra helsta áhugamál voru íþróttir og tölvuleikir.
Ástæðan fyrir eineltinu var að strákurinn hafði engan áhuga á stelpum, var frekar búttaður og hafði engan áhuga á íþróttum, og var eiginlega bara lélegur í íþróttum. Þess vegna var honum strítt, en það var allt í lagi hugsuðu allir, hann er öðruvísi, hann vill ekki vera eins og við og þá getur hann ekki verð með í hópnum.
Ég man það eins og það hafi gerst í gær hvað ég skammaðist mín ef að hann sagði svo mikið sem HÆ við mig úti á almannafæri, það mátti engin sjást tala við hann, nema örfáu vinir hans sem voru mikið yngri en hann og með sömu áhugamál. Fannst mér þetta virkilega í lagi, segja ekki HÆ við bekkjar félaga minn bara vegna þess að hann var öðruvísi!
Ég tók ekki þátt í þessu sem gerandi, en ég lét engan vita, og ég flissaði með þegar hinir strákarnir gerðu grín að honum, og við flestar stelpurnar gerðum það.
Ég er 18 ára í dag og finnst það óskiljanlegt að það eru bara 2 ár síðan ég var svona óþroskuð. Í dag ef ég hitti þenna strák úti í búð segi ég hæ að fyrra bragði og fer jafnvel að spjalla við hann og auðvitað er það allt í lagi!
Vekjum athygli á einelti! Einelti á enginn skilið, þótt hann sé öðruvísi, en fyrst og fremst vekjum athygli á HVAÐ einelti er! Einelti er ekki bara þegar hópur af krökkum myndar hring utan um einn og hlær að honum.
Það er myndin sem ég hafði í hausnum á mér um hvað einelti væri, en svo er alls ekki. Einelti er líka þegar þú horfir hornauga til manneskjunar í hinu horninu á búðinni og hlærð með vinum þínum að hárinu hennar!
