Mig langaði aðeins að tala um sjoppustörf. Ég sjálf/ur vinn í búð og hef unnið þar í nokkur ár. Það sem mig aðallega langaði að ræða er hvernig komið er fram við unglinga og mjög oft bara fullt af fólki sem vinna í búð.

Ég vil bara minna fólk á það, og ég tala nú ekki um fólk sem að þarf lítið til að pirra, að ef þið eruð einhverra hluta vegna ósátt við matinn ykkar eða ísinn ykkar er ekki nógu stór, sósan nær ekki niður á brauðformið, allt of lítill laukur á pulsunni þinni, stóllinn þinn vaggar og það brakar í honum, tappinn á kókflöskunni þinni er beyglaður, hamborgarinn er ekki með nógu mikla tómatsósu, það er vond lykt á klósettunum og ég get talið upp endalaust, að ef að þetta er eitthvað sem pirrar ykkur.. þá er það í FLESTUM tilvikum..ég endurtek FLESTUM tilvikum ekki unglinganna vandamál.

Við erum ekki grillarar í verslununum, tæknilega séð megum við það ekki. Við vitum aldrei hvað þér finnst vera 100% flottur ís, og hvað þér finnst vera 100% góð pulsa. Við sjáum ekki um viðgerðir á stólunum, við setjum ekki tappana á flöskurnar, við hvað þá sjáum ekki um að gefa frá okkur góða lykt inn á klósettunum og ef að sápan er út um allt og bréfið, þá er það ekki starfsfólkinu að kenna, heldur kúnnunum.

Þeir sjá ekki sóma sinn í því að þurrka sér snyrtilega og henda því í tunnurnar, og þeir geta ekki hitt sápunni í lófann á sér, og aftur segi ég að allaveganna í flestum tilvikum sjáum við ekki um grillið. Þegar ég tala um unglinga er ég að tala um unga krakka á aldrinum 14-16 jafnvel 17 ára.. sem fá vinnu í sjoppu.

Dæmi um það hvernig sjoppustörf geta nú tekið á taugarnar..þá fékk ég vinnu í búð fyrir nokkrum árum. Ég mætti alltaf kát/ur og glöð/glaður í vinnuna og vildi allt fyrir kúnnana gera. Ég spurði þau kurteisislega hvort ég gæti eitthvað aðstoðað þau en fékk því miður ekki nógu oft jákvæð og hressandi viðbrögð.

Yfirleitt var rakkað niður allt sem ég gerði. Hitt og þetta sem ég var ennþá að læra var ekki nógu gott hjá mér, allt var ömurlegt. Fólk kvartaði undan því að unglingar á mínum aldri ættu ekki að fá vinnu í svona sjoppum.

Mér fannst þetta strax ömurlegt. Ég sem kom bæði í þeim tilgangi að hafa eitthvað að gera, reyna jafnvel að gleðja annað fólk með því að brosa og vera jákvæð í vinnu.. en fékk aldrei þau viðbrögð sem ég vildi fá til baka. Og þá tala ég ekki um að ég vildi að fólkið kæmi til mín á handahlaupum og öskraði góðan daginn svo hátt að varirnar rifnuðu í tvennt.. þvert á móti! Ég vildi bara fá bros og kurteisislegt „Góðan daginn“ J

Það sitja allar leiðinlegar minningar í mér, þegar fólk kemur öskrandi inn, rífst og skammast í mér, ætlast svo til þess að ég sé að fara að gera einhverja lúxus pulsur handa þeim, risastóra og bragðgóða shake-a, og steiki svo safaríkan og djúsí hamborgara á eftir.

Auðvitað hef ég ekki mikla ánægju af því að gera eitthvað flott og framandi fyrir þann sem öskrar og skammast í mér og nýtur þess. Hann sest ánægður inn í sal, búin að fá það sem hann vildi… og brjóta niður saklausan ungling, sem ætlaði bara að sýna kurteisi og hlýju.

Við unglingar hefðum líka alveg getað sleppt því að sækja um vinnu í öllum þessum sjoppum, en ég get lofað ykkur því að þið fengjuð jafnvel minni afgreiðslu þá. Ég veit um mörg tilfelli þar sem að unglingarnir í sjoppunum eru stór partur af búðinni.

Við röðum í hillur, við fyllum á allt fyrir ykkur, við hlaupum um alla búð til að sækja það sem ykkur vantar, og til að ná í hitt og þetta fyrir kúnnana. Við tökum af borðunum, þurrkum af þeim, vöskum upp diskana ykkar, og hendum ruslinu eftir ykkur.. við meira að segja RÖÐUM stólunum eftir ykkur!

Það er að sjálfsögðu mjög notalegt að labba inn í búð, upp að afgreiðsludömunni/drengnum.. öskra og garga af lífs og sálarkröftum eins og þú getur hvað allt sem hann gerir sé ömurlegt, biðja svo um dýrasta og flottasta hamborgarann sem er til þarna…láta þjóna sér til borðs, og svo þarftu ekki einu sinni að hafa fyrir því að raða stólnum þínum og ganga frá eftir þig. Nei ég geri það fyrir þig!

Langaði bara að minna ykkur á þetta, þið sem lesið þetta að unglingar hafa líka tilfinningar. Þetta er mjög sárt að fá svona skítakomment á sig fyrir hvað sem maður reynir að gera fyrir kúnnann.

Ég vil frekar fá hrós…það hvetur mig áfram til að gera fleiri góða hluti. Ef þér mislíkar eitthvað geturu alveg eins sagt það í kurteisistóni og bent mér vingjarnlega á það. Ég þigg það frekar heldur en öskur og garg.

Við erum framtíðin.. stattu vörð um framtíðina, í staðinn fyrir að brjóta hana niður um leið og við reynum að sýna hvað í okkur býr.

Gefðu okkur tækifæri.