Við fengum Karítas til að segja frá dvölinni:

Ég sá auglýsingu um tíu vikna námskeið hjá ABC skólanum en Bryndís er skólastjóri og sá hún um undirbúning námsins. Þróunarstarfsemi vakti mig mikið til umhugsunar áður en ég fór í skólann. Ég hafði heyrt margar sögur um hjálparstörf sem glíma við spillingu og þjófnað. ABC skólinn breytti hugarfari mínu gagnvart þessu og sá ég að það væri hægt að hjálpa þó að ég ein gæti ekki gert allt.

Fljótlega eftir að skólanum lauk þá pantaði ég flug til Nairobi í Kenýa ásamt níu öðrum hetjum. En þar er ABC skóli staðsettur og er hann í umsjón Þórunnar sem er íslensk kona.

Þegar ég kom út varð þetta fyrst raunverulegt fyrir mér. Fyrsta skiptið sem við heimsóttum krakkana þá gat ég ekki annað en grátið. Þarna sá ég mörg hundruð börn saman kominn og tóku þau á móti okkur með gleði og söng. En öll þessi börn eiga íslenska styrktarforeldra.

Ég tók líka eftir því að eldri börnin sem höfðu verið lengur tóku utan um litlu börnin sem voru nýkominn inn í skólann. En mörg þeirra áttu sér draum um að hjálpa öðrum börnum þegar þau væru orðin stór.

Við fórum svo í heimsókn til nokkurra foreldra og fengum að sjá heimilisaðstæður barnanna sem ekki voru á heimavist en fara þó í skóla ABC. Undantekningarlaust var ástandið slæmt allsstaðar og mikil neyð var á þeim öllum. En það að börnin gátu farið í skóla breytti mjög miklu sérstaklega vegna þess að þar fá þau að borða og hafa læknisþjónustu. En menntun gefur líka von um betra líf fyrir börnin.

Þegar við komum fyrst í skólann gátum við ekki séð að þessi börn hafi þurft að fara í gegnum mikla erfiðleika og hungur. Það var stór munur að sjá börnin sem voru í ABC skólanum og þeim sem voru ekki í skólanum. ABC leggur mikla áherslu á ást, umhyggju og kærleika. Enda voru börnin sem búa á heimavistinni hjá þeim glöð og er námsárangur þeirra framúrskarandi í Kenýa.

Við fórum í safaríferð þar sáum við náttúrulíf í Kenýa. Um kvöldið leit ég til himins en ég hef aldrei séð jafn margar stjörnur á einu augnabliki og gerði ég mér þá grein fyrir hvað Guð er stór.

Seinustu dagana í ferðinni fórum við í Massaia þorp en það er ættbálkur sem er útbreiddur í Kenýa. Þeir eru þekktir meðal annars fyrir að stökkva hæð sína. Það var tekið á móti okkur með handabandi fólk í allskonar litskrúðugum klæðnaði með allskyns skart. Okkur stelpunum þótti skartið þeirra og klæðnaður mjög heillandi. Þetta annars ágæta fólk býr við allt aðra menningu og siði en við. Það sem þeim finnst vera eðlilegt finnst okkur alveg hræðilegt.

Þar eru t.d. ungar stelpur umskornar fyrir giftinguna á hryllilegan hátt með glerbroti eða öðru beittu áhaldi. Margar hverjar láta lífið mjög fljótlega á eftir vegna sýkinga. Þær eru giftar sem börn og mennirnir eiga oft fjórar konur fyrir og geta verið allt að áttatíu ára gamlir. Stelpurnar fá ekkert um það ráðið því í raun og veru eru þær bara seldar.

Ein af stúlkunum frá þessu þorpi komst í gegnum Peninu í heimavist ABC í Nairobi. Penina er kona sem hefur hjarta fyrir því að sjá þetta ofbeldi gegn konum stoppa. Þessi stúlka sem komst í heimavistina er frá þessu Massaia þorpi og útfrá henni kviknaði áhugi á að hjálpa þessu fólki.

Í dag er ABC að byggja skóla þarna í massaia þorpinu en nú eru þegar kominn hundrað og tuttugu börn í þann skóla.

Núna þarf þó nýja styrktaraðila fyrir þessu – 120 börn sem eru að hefja skólagöngu sína og kostar það rúmar 3000 kr fyrir hvert barn. Okkur þótti mjög sérstakt og skemmtilegt að fá að taka þátt í að byggja þennan skóla meðan við vorum þarna úti. Lengi vel hugsaði ég það er hvort eð er aldrei hægt að bjarga öllum því það er svo mikið að fólki sem sveltur og býr við ofbeldi. En eftir að hafa komið þarna út og hitt börnin sem ég er sjálf að styrkja þá sá ég að þarna hafði ég raunverulega bjargað mannslífum.

Öll erum við eins þráum að sjá börnin okkar vaxa, eiga von og framtíð. Kæri lesandi ég vona að þetta veki þig til umhugsunar.Símanúmerið hjá ABC er 414-0990.