Ég get ekki orða bundist lengur og verð að tjá mig til kynsystra minna. Ég vildi óska að vitundarvakning yrði hjá konum sem hafa lent í slæmri reynslu af hendi kærasta eða eiginmanns sem hefur horfið í faðm annarrar konu.
Þessi kona sem þeir fóru til „stal“ honum ekki! Ég horfi á vinkonur mínar hata „þessa konu“ af lífi og sál og vinkonurnar taka undir hvers konar helv*** dr**** þessi vonda kona sé. „Stelur bara manninum frá mér!“
Ég hef horft upp á vinkonur mínar hella glasi yfir „vondu konuna“ á skemmtistað – af því að hún eyðilagði sambandið þeirra. Kona sem hefur kannski enga hugmynd um hvað gerðist.
Sorry, þetta er ekki svona. Ég þori að fullyrða að í 95% tilfella er þetta ekki svo. Ég stunda ekki þennan leik sjálf en get ekki annað séð en að þetta sé sjaldnast konunni að kenna. Þetta er manninum að kenna og engum öðrum.
Ef þú áttir mann sem gerði slíkt var það af þeirri einföldu ástæðu að samband ykkar stóð ekki á nægilega traustum fótum. Eitthvað vantaði upp á ástina, maðurinn var eitthvað laus í rásinni. Ef þessi kona hefði „stolið“ honum, af hverju gast þú þá ekki „stolið“ honum til baka? Þetta gengur ekki svona fyrir sig.
Reyndu að bera ekki kala til þessarar konu. Verum sanngjarnar við hvor aðra. Þú veist t.d. ekkert hvað hann hefur sagt henni. Hann gæti hafa sagt henni að þið væruð hætt saman, þú værir svona eða hinsegin eða guð-má-vita-hvað. Sennilega færðu aldrei að vita það og þú ættir ekki að vera vond út í hana. (Það er að sjálfsögðu annað mál ef þið þekkist, ég er ekki að tala um svoleiðis dæmi)
Ef þú áttir mann eða kærasta sem fór frá þér fyrir aðra konu, ekki vera reið út í hana. Ekki vera reið yfir höfuð ef þú getur. Vertu fegin að sjá hverskonar mann þú varst að hitta, vonandi var það fyrr en seinna. Taktu þessari erfiðu reynslu með opnum huga og ef/þegar þú ferð í samband aftur veistu að hverju þú ert að leita og vonandi finnur þú mann sem er þess virði að fá að hitta þig.
