„Við vorum eiginlega alveg orðlausar að vinna þessi verðlaun sem gerist nú ekki oft í níu kvennahópi,“ segir Anna María Björnsdóttir, 25 ára íslensk stelpa úr Garðabænum en hljómsveit hennar IKI vann dönsku tónlistarverðlaunin 2011.

Söngkonurnar níu

„Þetta er okkur mjög mikill heiður og hvetur okkur að halda áfram á sömu braut. Platan sem vann til verðlaunanna var tekin upp á þremur dögum en við spunnum tónlist alla þá daga og völdum svo uppáhaldslögin okkar frá þessum upptökum til að hafa á plötunni.“

Anna María á ekki langt að sækja tónlistarhæfileikana en hún kemur úr tónelskri fjölskyldu og spila foreldrar hennar meðal annars á harmonikku og sög. Anna María spilar þó sjálf á píanó en aðspurð kveðst hún glamra á harmonikk og gítar.

„Við erum 9 söngkonur og komum frá 4 Norðurlöndum. Öll tónlist og allur texti er spunnin á staðnum. Hlutverk okkar eru mismunandi en við tökum allar sóló, syngjum sem hluti af hljómsveit, eða kór, í dúettum, tríóum, kvartettum, kvintettum o.s.frv. en líka einradda allar saman. Hlutverkin eru síbreytileg en hver og ein kemur með sína rödd, sinn uppruna, þekkingu og söngstíl í hljómsveitina.

Ég kem því með íslenskuna og minn uppruna. Við erum með heimspeki í hljómsveitinni sem byggir mest á því að vera í núinu. Það krefst gríðarlegrar einbeitingar að spinna tónlist í hóp þar sem þú hefur aðeins þína rödd, þín eyru og þitt innsæi til að vinna með og skapa tónlist. Það eru engar reglur eða rammar til að fylgja og engin ein sem stjórnar, þú veist því aldrei hvað gerist næst!

Það er nánast ómögulegt að gera þetta einlægt og án tilgerðar ef hugurinn er að trufla mann með hugsunum en tónlistin verður að okkar mati best þegar allar ná þessari núvist og tónlistin flæðir eðlilega. Það er líka gaman að sjá hversu mikil áhrif hver og ein hefur á hvernig tónlistin verður hverju sinni.“

Það er ekki aðeins stefna hljómsveitarinnar að lifa í núinu en Anna María aðhyllist einnig þeirri speki og les sér mikið til um nýaldarheimsspeki.

„Ég hef lesið margar bækur um þessa hluti og mínar uppáhalds bækur eru „Mátturinn í Núinu“ og „Ný Jörð“ eftir Eckhart Tolle. Bækurnar fjalla mest um það að lifa í núinu, því það er það eina sem nokkurn tímann er. Fortíðin er liðin, ekkert sem hægt er að gera til að breyta henni þó hægt sé að læra af henni og framtíðin kemur aldrei til manns sem framtíðin heldur aðeins sem hin líðandi stund. Það er því núið, akkúrat núna sem er það eina sem nokkurn tímann er. Þetta er mjög einföld speki en manni hættir svo oft til að lifa annaðhvort í fortíðinni eða framtíðinni.“

Anna María er stödd á Íslandi um þessar mundir en hún er að taka upp sína fyrstu sólóplötu.

„Þetta er tónlist sem ég hef samið á síðustu tveimur árum. Ljóðin eru öll eftir íslensk skáld, flest íkringum 100 ára gömul. Tónlistin er svolítið þjóðleg en með popp-jazz keimi.“

Söngkonan lætur þó ekki þar við setja heldur stefnir hún á að taka upp aðra plötu með hljómsveit sinni IKI, fara á tónleikaferðalag og kynna sólóplötuna væntanlegu.