Næsta laugardag munu stöllurnar Lilja og Hildur Líf halda partý fyrir þá sem þær telja tilheyra alvöru þotuliðinu á Íslandi. Þær segja alla VIP-menningu vanta í íslenskt skemmtanalíf.
Í lokuðu boði sem sent var út á Facebook um helgina segir að þeim finnst: „vanta atburð þar sem aðeins þetta fólk kemur fyrir og hinir fái ekki aðgang.“
Bleikt náði tali af Lilju og spurði hver hugmyndin að baki væri.
„Þetta var bara hugmynd frá mér og Hildi Líf. Hana langaði að hafa venjulegt partý en mér datt í hug að hafa lokað boð fyrir fræga fólkið.
Það verður rauður dregill, skemmtiatriði, happdrætti og fordrykkir. Það verða svona lokuð VIP flöskuborð sem eru alveg afmörkuð.
Stelpurnar úr Ungfrú Reykjavík og Ungfrú Vesturland eru hluti af boðsgestum ásamt nóg af fallegu kvenfólki og auðvitað verður mikið úrval af karlpeningi þar einnig.“
Er til eitthvað sem heitir fræga fólkið á Íslandi?
„Það er þetta fólk sem er alltaf í fjölmiðlum og því finnst mikilvægt að vera þar. Leikarar, sjónvarpsfólk og í skemmtanabransanum. Svo líka íþróttamenn, en þeir eru ekki alltaf á landinu.
Við munum samt opna fyrir fólk sem er ekki á gestalista kl. 12.“
Hverjir eru hinir sem fá ekki aðgang?
„Nú þeir sem eru ekki á gestalista. Þeir sem eru ekki í fjölmiðlum. Ég er búin að vera mikið úti í LA og New York, ég bjó þar í tvö og hálft ár, og það er ekki bara einhver í flottum partýum. Þau vilja ekki fá almenning inn á staðinn.
Það er alltaf einn og einn sem hangir í fræga fólkinu og það er pirrandi. Maður nennir því ekki. Þeir sem eru í bransanum kunna að haga sér í sviðsljósinu.“
Teljið þið að þörf sé á svona exclusive VIP-menningu á Íslandi?
„Þetta er alls staðar annars staðar. Íslendingar verða móðgaðir ef þetta er eitthvað öðruvísi. Það var til Hollywood hér á Íslandi í gamla daga. Þar var þjónn á salerninu.
Á Eddunni fékk fólk ekki að fara inn nema að vera á gestalista, og líka í Skjás eins partýinu á laugardaginn. Það er svipað – bara fyrir þotuliðið. Mér finnst vanta alvöru partý þar sem hinir eru ekki boðnir inn.“
Hvað er framundan hjá þér?
„Ég er að klára stúdentinn og ætla svo í sálfræði í Háskólanum í haust. Í sumar mun ég vinna úti í New York eða Noregi, það er ekki alveg ákveðið.“
