Eftir að hafa hlustað á enn eina vinkonuna hella úr sér yfir því hvað lífið er óréttlátt, að gæinn hafi haldið framhjá henni einu sinni enn og að hún hafi virkilega trúað því að hann myndi breytast, minnka djammið og fara að huga að fjölskyldu fór ég að pæla í þessari setningu:
„Góðu gæjarnir eru allir hommar eða fráteknir“
Þessi setning! Það er ekkert lítið sem hún pirrar mig! Halda virkilega sumir að hommar geti ekki haldið framhjá eða farið illa með hvorn annan? Eru sumir virkilega svo blindir að trúa því að allir góðu gæjarnir séu á föstu? Ég held að stelpur sem haldi þessu fram séu ekki að leita á réttu stöðunum.
Ég þekki stelpur sem fara í samband eftir samband við svipaðar týpur. Týpur sem halda framhjá þeim, neita að vinna, koma illa fram við þær, gera lítið úr þeim til að upphefja karlmennsku sína og taka ekkert tillit til neins annars en sjálfs síns. Oftar en ekki vita þær bakgrunnssögu gæjans og halda samt að þær geti breytt honum.
Ef þær elska hann nógu heitt þá sjái hann að sér, hætti að djamma, hætti að kyssa aðrar stelpur o.s.f. Þær finna þessa stráka oftast á djamminu. Fara með þeim heim, skiptast á númerum og verða svo sárar ef þeir hringja ekki strax daginn eftir.
Það sem ég hins vegar skil ekki er hvers vegna þær fara ekki eitthvað annað að leita sér að mannsefni. Af hverju ekki að gefa öðrum týpum séns? Djammararnir eru ekki að leita sér að sambandi, þeir vilja bara djamma og hafa gaman. Það er hins vegar til fullt, fullt af mönnum þarna úti sem koma vel fram við konur. Menn sem opna hurðir, taka kápuna, kalla okkur drottningar og prinsessur en ekki hórur og druslur.
Þessa menn finnur þú ekki á djamminu. Þeir eru í Þjóðarbókhlöðunni að lesa fyrir próf, upp í HR að skrifa lokaritgerð eða hreinlega inn í Nexus að ná sér í nýjustu bókina eftir uppáhaldshöfundinn.
Já, það eru nefnilega mennirnir sem við flestar tökum ekki eftir, mennirnir sem falla í skugga háværu töffarana, sem koma best fram við konur. Þessar týpur sem hafa áhuga á rómantík og huga að framtíðinni með því að hella sér út í nám.
Týpurnar sem eru metnaðarfullar og fara langt í lífinu. Það eru þeir sem koma fram við þig eins og þú átt skilið. Ekki djammarinn sem lifir fyrir núið.
