Gamla, góða Sinalco-ið kemur á markaðinn innan tíðar á vegum Helga Vilhjálmarssonar í Góu-Lindu. Endurkoma Sinalco vekur upp minningar um gosdrykki og sælgæti frá fyrri tíð.
Nöfn eins og spur cola, jolly cola, fresca og jafnvel póló hafa komið upp í hugann við að lesa fréttirum endurkomu Sinalcosins á íslenskan drykkjarvörumarkað. Helgi Vilhjálmsson í Góu-Lindu hefur flutt inn einn gám af Sinalco og ætlar kannski að hefja framleiðslu á þessum eðaldrykk.
Bleikt fékk Þorstein Arnarson, formann stjórnar Iðnaðarsafnsins á Akureyri, til að setjast í nostalgíustellingar og rifja upp með sér drykki frá áttunda áratugnum. Þorsteinn segir að Íslendingar hafi átt sér ýmsa gosdrykki á áttunda áratugnum, bæði fyrir norðan og sunnan. Sinalco hafi verið framleitt í Reykjavík í nokkur ár en fyrir norðan hafi verið framleiddur drykkur sem hafi heitið vallas eða wallace að sig minni. Sá drykkur hafi líka bara verið framleiddur í nokkur ár.
„Svo áttum við drykk fyrir norðan sem fór ekki hátt og fór ekki víða. Þetta var bíó cola sem var bara framleiddur fyrir eitt bíó. Þetta var dökkur drykkur og við eigum ennþá eina flösku af honum. Ég held að þessi drykkur hafi verið framleiddur upp úr 1960,“ segir Þorsteinn.
Gosdrykkja- og sælgætisframleiðsla átti sér stað bæði fyrir norðan og sunnan á áttunda og níunda áratugnum en hefur nú mestöll færst suður. Þorsteinn segir að Lindu-súkkulaðið hafi verið vinsælt fyrir norðan. Í staðinn fyrir Prince poli var svo Conga-súkkulaðið. Þorsteinn rifjar upp að Helgi í Góu hafi keypt Lindu og breytt eitthvað vörum og innihaldi í konfektkössunum.
„Góður vinur minn keypti alltaf Lindu-konfekt. Hann hringdi einu sinni í hann og skammaðist aðeins því Helgi hafði breytt besta molanum í kassanum og þá var ekkert gaman að þessu lengur,“ segir Þorsteinn.
