„Mér líður eins og ég sé með tifandi tímasprengju inni í mér.“ Ófrísk kona á fertugsaldri sem fékk PIP-púða hjá Jens Kjartanssyni árið 2007 er bæði reið og óttaslegin vegna fyrstu niðurstaðna úr ómskoðun, en um 80% kvenna sem skoðaðar voru reyndust vera með leka púða.
Konan sem gengur með sitt fyrsta barn segir að niðurstöðurnar sýni að púðarnir geti lekið þá og þegar. „Brjóstin á mér eru auðvitað að stækka og líkami minn að breytast. Miðað við þessar niðurstöður virðist það mjög líklegt að púðarnir fari að leka og ég hef ekki möguleika á að fara í aðgerð eins og staðan er í dag. Svo hef ég að sjálfsögðu áhyggjur af brjóstagjöfinni líka. Það er búið að ræna mig þeirri tilhlökkun að geta gefið barni mínu brjóst. Brjóstagjöf á að vera gleðilegt, ekki eitthvað sem veldur manni kvíða,“ segir þessi ófríska kona í samtali við Bleikt.
Þessi verðandi móðir vill að sjálfsögðu fá að vita hvort lekinn gæti haft áhrif á ófætt barn hennar. „Ég er mjög hrædd og þarf að fá frekari upplýsingar sem allra fyrst.“
Rúv sagði í fréttum sínum að 42 konur hefðu komið í ómskoðun og 34 hefðu verið með leka púða, þannig að hlutfall púða sem leka eru um 80%. Þetta var aðeins um fyrstu skoðun að ræða en um 400 konur fengu púðana.
Í bréfi sem Bleikt hefur undir höndum og var sent öllum konum sem fengu PIP-púða á árunum 2000-2010 áður en þær fóru í ómskoðunina segir m.a. þetta:
Óvíst er þó um áhrif PIP-púðanna á þær konur sem ganga með barn.
