Ritstjórn barst þessi aðsenda grein í pósti:
Á sunnudaginn var ég að aka austur fyrir fjall á leið til Þorlákshafnar. Í Þrengslunum leit ég í baksýnisspegilinn og sá bíl dálítið fyrir aftanmig. Færðin var léleg og stórir snjóskaflar alls staðar. Ég var á litlum bíl svo ég hægði á mér, enda bara búin að vera með bílprófið í mánuð.
Ég ek niður fjallið og þegar ég er komin framhjá Hveragerðisafleggjaranum sé ég að bíllinn sem var fyrir aftan mig er kominn alveg upp að mér og rýkur svo framúr í miðjum snjóskafli. Bíll var að koma á móti mér og í sömu andrá þyrlast snjórinn upp og ég sá ekki neitt. Áður en ég vissi af var ég komin yfir á hina akreinina, bíllinn sem var að koma á móti mér sveigði út af til að lenda ekki framan á þeim sem var að taka fram úr mér. Bíllinn minn valt.
Þau sem tóku fram úr mér óku bara í burt og ekkert sást til þeirra frekar. Konan sem kom úr gagnstæðri átt stoppaði og hringdi í Neyðarlínuna. Ég var föst inni í bílnum. Maður kom og dró mig út um skottið. Sjúkrabíll og lögregla komu á staðinn og ég sagði þeim alla söguna.
Að því loknu fór ég í tékk á spítala. Einhverjir verkir í baki, höfði og öxl eru ennþá að pirra mig en það sem ég vil aðallega koma á framfæri hér er að fólk gæti sín þegar það rýkur svona framúr. Þó svo að fólk kunni að aka í snjó og í lélegri færð þá eru margir úti í umferðinni nýkomnir með bílpróf. Eins og ég. Ég er ekki vön að aka í lélegri færð.
Hinir í umferðinni vita ekki hvort ég er gömul kona eða unglingur, nýkominn með bílpróf eða ekki. Ég beygði útaf til að forða slysi þar sem fleiri hefðu getað slasast. Ég beygði út af til að forða slysi þar sem fleiri hefðu getað slasast. Hver sá var sem ók fram úr mér, hefur ekki komið í ljós. Sá sem olli því að ég velti bílnum og þori enn ekki að fara út í umferðina á nú. Ég vona að fólk passi sig í þessari færð. Ef fólk gerir það er hægt að koma í veg fyrir meiriháttar slys.
