Sigríður Guðmarsdóttir, prestur í Guðríðarkirkju, er sú fyrsta sem hefur boðið sig fram til biskups. Hún ætlar að verða biskup sem tekur til hendinni, talar til þjóðarinnar um trúna og innstu gildi og stendur fyrir opna stjórnsýslu og lýðræði.
„Ég ætla að vera biskup sem sinnir söfnuðunum og hinu trúarlega starfi af frumkvæði, áhuga og gleði,“ segir Sigríður.
Hvað finnst þér um staðgöngumæðrun? Á að leyfa staðgöngumæðrun (alveg eða í velgjörðarskyni)? Hvað finnst þér um fóstureyðingar?
Margt er ólíkt með þessum tveimur siðferðilegu álitamálum. Staðgöngumæðrun og fóstureyðingar eiga það hins vegar sameiginlegt að snúast um líkama kvenna og ákvörðunarrétt þeirra yfir honum. Ég styð rétt kvenna til fóstureyðingar, en tel líka að fóstureyðingar séu alltaf neyðarúrræði.
Tillaga var samþykkt í gær um Alþingi í gær um að Alþingi skipi starfshóp til að vinna að lagafrumvarpi um staðgöngumæðrun í velgjörðarskyni. Þjóðmálanefnd íslensku Þjóðkirkjunnar undir forystu Baldurs Kristjánssonar, Sólveigar Önnu Bóasdóttur og Sigrúnar Óskarsdóttur setti saman ítarlegt álit á staðgöngumæðrun þar sem lagst er gegn því að farið sé hratt í gegnum þetta ferli.
Ég tek undir þetta álit sem má finna á síðu Þjóðkirkjunnar. Ég hafna staðgöngumæðrun sem greitt er fyrir og hygg að svo sé um flesta Íslendinga.
Hvaða stefnu finnst þér að kirkjan eigi að hafa í kynferðisbrotamálum?
Þjóðkirkjan hefur skýra stefnu í kynferðisafbrotamálum og hefur á að skipa fagráði fyrir um meðferð kynferðisafbrots og áreitni ef einhver starfsmann kirkjunnar hafa á sér brotið. Ég þyrfti því ekki að búa til stefnuna en ég þyrfti að leggja áherslu á að okkar góðu stefnu sé fylgt.
Eru íslenskt þjóðfélag að taka nógu sterkt á þessum brotum, til dæmis dómstólarnir?
Það hafa lengi viðgengist skammarlega lágir dómar við kynferðisbrotum á Íslandi, en vonandi er það að breytast.
Hvernig finnst þér skólakerfið taka á eineltismálum svona heilt yfir?
Það er erfitt að fullyrða um skólakerfið í heild, víða er verið að halda vel utan um fræðslu og þau sem verða fyrir einelti og síður á öðrum stöðum. Betur má ef duga skal.
Íslendingar vöktu athygli fyrir framgöngu í jafnréttismálum fyrir nokkrum áratugum. Hvernig finnst þér jafnréttismálin standa í dag?
Margt finnst mér ganga mjög vel og annað miður. Ég hef áhyggjur af vaxandi klámvæðingu, ofbeldi gegn konum og hversu hægt gengur að afnema launamun kynjanna. Ég held að það væri mjög jákvætt fyrir jafnréttisbaráttuna ef kona yrði biskup, því að á Norðurlöndum er aðeins eitt land þar sem kona hefur ekki verið vígð biskupsvígslu. Það er Ísland og nú er kominn tími til að breyta því.
