Einkaþjálfari, ketilbjölluþjálfari og mamma. Þessi þrjú orð má nota til þess að lýsa Yrju Dögg Kristjánsdóttur, 25 ára skvísu úr Mosfellsbænum. Yrja hefur stundað íþróttir frá 5 ára aldri, verið bæði í fimleikum og frjálsum íþróttum en þegar hún varð 18 ára varð hún að hætta vegna meiðsla.

Hún lét það þó ekki stoppa sig heldur hellti hún sér út í einkaþjálfaranám og lagði áherslu á ketilbjöllur. Yrja átti gullfallega stelpu fyrir 14. mánuðum síðan og fékk litla daman nafnið Viktoría Nansý. Yrja segir okkur aðeins frá ketilbjöllunum og hvernig henni gekk að halda sér í formi á meðgöngunni.

Hvað er Ketilbjalla?

„Ketilbjalla er kúlulaga lóð með handfangi sem er ekki ósvipað katli í útliti. Þetta er rússnesk æfingatækni sem þróaðist í gegnum aldirnar en upphaflega voru lóðin notuð til að vigta varning á mörkuðum. Það sem er svo heillandi við bjöllurnar er að þær gefa hagnýtan styrk, þú einangrar aldrei vöðva og allur líkaminn fær að taka á því á einni æfingu. Þær eru skemmtilegar og það er auðvelt að gleyma sér á æfingum því þetta tekur á og maður þarf að vanda sig.

Maður getur líka tekið hörku æfingu með einni bjöllu á einum fermetra, hvar og hvenær sem er. Þetta þarf ekki að vera flókið. Það sem einnig heillar er að þú nærð í alla vöðva líkamans. Þetta er mikil samhæfing sem krefst oft jafnvægis sem þýðir meiri virkni í stoðkerfinu. Þær styrkja og tóna alla vöðva líkamans og þá sérstaklega axlir, neðra bak og kviðvöðva.

Rétt líkamsbeiting er alltaf mikilvæg, í hverju sem er. Í ketilbjöllum er hún sérstaklega mikilvæg, það á enginn að komast upp með að beita sér vitlaust. Ég er að kenna ketilbjöllunámskeið í Heilsuræktinni hér á Akureyri og passa að allir beiti sér rétt.“

Yrja með ketilbjöllurnar

Geta allir notað Ketilbjöllur?

„Það geta langflestir verið í bjöllunum, Maður velur sínar þyngdir og fer á sínum hraða. Auðvitað eru einhverjir sem eiga við einhver vandamál að stríða (axlir, bak) en þeir þurfa að byggja sig hægt og rólega upp í þessu eins og öðru.

Ég æfi mikið með bjöllunum en einnig með eigin líkamsþyngd, upphífingar, hopp, armbeygjur og fleira. Ég nota stangir, bolta, teygjur og allskonar aukahluti. Eitthvað sem ég hef ekki snert lengi eru handlóð.“

Hvenær fórstu í einkaþjálfaranámið?

„Ég hóf nám haustið 2007 og útskrifaðist sem ÍAK einkaþjálfari vorið 2008. Ég fór á fullt að þjálfa og er búin að vera í kringum hreyfingu og þjálfun síðan. Ég stefni auðvitað á meira nám en það hefur ekkert heillað mig nægilega vel ennþá, mig langar ekki í íþróttafræðina og sjúkraþjálfarinn heillar mig ekki nógu vel. Mig vantar eitthvað annað sem ég veit ekki hvað er.“

Hvernig byrjar hefðbundin dagur hjá þér?

„Ég byrja daginn á hressandi berja-smoothie eða hafragraut, vítamínum, vatni og smá kaffi. Ég er ekki endilega nammigrís en ég lifi ekki daginn af án þess að fá mér súkkulaði. Ég reyni þá að hafa það í hollari kantinum, 70% súkkulaði, hrásúkkulaði eða bara eitthvað sem ég kemst í.“

Yrja er í hörkuformi

Hvernig gekk að hreyfa sig á meðgöngunni?

„Ég hreyfði mig mikið á meðgöngunni. Bæði vegna vinnunnar en ég þjálfaði ketilbjöllur og svo æfði ég sjálf 3x í viku, og fór í klukkutíma göngutúra 2x í viku. Ég var í mjög flottu og góðu formi alla meðgönguna og átti auðvelt með að hreyfa mig, en það kom svolítið í bakið á mér í fæðingunni.

Ég var ótrúlega þakklát fyrir að hafa ekki fengið í bakið eða grindina því hreyfing er eitthvað sem heldur geðheilsunni hjá mér í lagi.“

Hvað varstu lengi að koma þér í samt form?

„Ég var komin í fyrra horf, útlitslega séð, á viku til 10 dögum eftir fæðingu. Það var magnað. En auðvitað tekur mun lengri tíma að jafna sig eftir fæðingu. Ég fór hægt af stað í æfingum og komst ekki aftur í gott form fyrr en rútínan á daglegu lífi fór af stað aftur, kannski 6 mánuðum eftir.

Annars æfði ég heima í stofu á meðan stelpan svaf. Hitaði upp með sippi og tók svo á því með bjöllunum. Einnig var ég dugleg að fara í göngutúra með vagninn. Hreyfing er mér mjög mikilvæg. Ég hef alltaf átt við kvíðavandamál að stríða og það er engin klisja að líkamsrækt er besta meðalið.“

Hvernig líkar þér móðurhlutverkið?

„Móðurhlutverkið er alveg jafn erfitt og það er dásamlega yndislegt. Dóttir mín er það besta sem hefur komið fyrir mig. Það er ólýsanleg tilfinning að eignast barn.“